ГККП "Отпан" Управления культуры,развития языков и архивного дела Мангистауской области

«Отпан» МКҚК 2009 жылы облыстық мәдениет басқармасы жанынан құрылды. Кәсіпорын Батыс Қаратаудың биік шоқысы, Балтық теңізі деңгейінен 532 м биіктікте Отпан тауға салынған «Адай ата- Отпан тау» тарихи-мәдени кешенінің музей қызметімен айналысады.

Отпан тау – Маңғыстау халқының қастерленген қасиетті тауы. Көшпелі тайпалардың ғибадаттарын өткізіп абыздардың орда тіккен жері. Жаугершілік заманда елді аман алып қалу мақсатында сарбаздардың белгі беріп – Ұран отын жаққан жері. Тау шыңына Маңғыстаудың үш түбегі анық көрінеді.

2004 жылы Отпан тауда Адай ата – Отпан тау этно-мәдени кешенінің құрылысы басталып, 2007 жылы 25 қазанда кешен салтанатты түрде ашылды.  Кешен ұлттық идеологияны көздейтін сәулеттік  құрылыстардан тұрады. Ақсарай – әу баста кешендегі ақсақалдар алқасының ордасы,  қазірде онда 6 залдан тұратын музей орналасқан. Музейдің экспозиция залдары: «Кешен құрылысы мен құрылымы» кіріспе залы, «Дала данышпандары», «Өлке жеріндегі ислам», «Маңғыстаудың қолөнері», «Нұрлы жол көшіндегі Маңғыстау» , «Маңғыстау тарихы» атты тұрақты көрме залдарынан тұрады. Ақсарай жанында барлық аналарымыздың құрметіне бағыштап қойылған «Ана келбеті» ескерткіші, 2017 жылы қойылған « Қазақтың үш биінің» ескерткіші , Отпанның шыңында ұлттық рухымыздың қуаты, Қазақтың қарашаңырағының иесі мен киесі – Адай ата кесенесі , көк түркілерден қалған рухани қуат жігеріміз бен ұлттық болмысымыздың тамыр- тегі  - «Көк бөрі» ескерткіші, үш жүздің алақанына салынған қазан бейнесіндегі алау жағатын «Бірлік оты» ескерткіші, Тәуелсіздігіміз бен мемлекетіміздің тұғырнамасы – Ту төбе, Маңғыстаудың 362 әулиесінің құрметіне – 362 баспалдақ Ақсарай ғимараты мен Адай ата кесенесінің арасын жалғап жатыр. 2014 жылы кешеннен Адайдың Тобыш ата ұрпақтарының бастамасымен «Бас қақпа», 2015 жылы Мұңал ата ұрпақтарының бастамасымен «Қарашаңырақ» ғимараты құрылыстары салынып берілді. Кешен аумағында Маңғыстаудың төл тумасы, жорық жыршысы Қалнияз Шопықұлы жерленген.

Кешенде жыл сайын түрлі шаралар өткізіледі. Сол шаралардың ең бастысы – Амал мерекесі. Амал мерекесі 2008 жылдан бастап жыл сайын Адайдың Сегіз Арыс ұрпақтарының бастамасымен облыстық деңгейде, 2018 жылдан бері облыстық әкімшілік пен мәдениет басқармасының  қолдауымен республикалық деңгейде тойланып келеді. Кешенде Маңғыстаулық құсбегілер мен саятшылықты дамыту, насихаттау бағытында «Салбурын» шарасы,2012 жылдан бері  «Атадан- бата, ағадан – тілек», «Батамен ер көгерер» сынды дәстүрлі шаралары өткізіліп келеді.

Кәсіпорынды  әр жылдары Жоламан Көшкінов, Құралбай Озғамбаев, Асқар Санауов, Еркебұлан Атшыбайұлы, Нұрлан Мусаев сияқты азаматтар басқарды. Қазіргі таңда кәсіпорынды мәдениет саласында көп жылдар бойы еңбек етіп келе жатқан Жадыра Кетеева басқарады.

 

Количество работников: 44