Түркістан облысының білім басқармасының Түркістан қаласының білім бөлімінің "Ә.Науаи атындағы №13 мектеп-гимназия" коммуналдық мемлекеттік мекемесі

Ә.Науаи атындағы №13 мектеп-гимназия – тәуелсіз Қазақстанның дамуына елеулі үлес қосып келе жатқан мектептердің бірі. Тарихи мәліметтерге сүйенсек, 1920-30 жылдарда Түркістан қаласында Ташкент темір жолына қарасты Некрасов атындағы мектеп жұмыс істеген. Ол мектепте өзбек, қазақ, орыс балалары тәлім-тәрбие алған.

 1931 жылы 25 маусымда оқу бөлімінің №110 бұйрығымен №42 өзбек мектебі жеке бөлініп шықты.

1976 жылы мектепке белгілі шығыстың ұлы ғұламасы  Ә.Науаи есімі берілді. Мектеп 1176 орынды. Жалпы алаңы - 6192 м2, жұмыс алаңы - 3994 м2, кітапхана алаңы – 36 м2, оқу залы 80 оқушыға арналған.

Ә.Науаи мектебі 1997 жылдың қаңтар айына дейін Алматы темір жолының білім бөліміне қараған. 1997 жылдың қаңтар айынан бастап Түркістан қалалық білім бөлімінің қарамағына өткізілді.

Мектеп ұжымының қанша жылдық еңбегін бағалай отырып, Оңтүстік Қазақстан облыстық білім беру департаментінің 2001 жылы 30 қараша №1649 бұйрығына сәйкес эксперимент алаңына енгізіліп,  жұмыс жүргiзіп, 2003 жылы 13 қыркүйек №1013 бұйрығына сәйкес Түркістан қаласындағы Ә.Науаи атындағы №13 орта мектеп «көп салалы мектеп-гимназия» мәртебесiне ие болды. Білім ордасы құрылғаннан бастап, осы күнге дейін мектепке жетекшілік еткен ұлағатты ұстаздар жайлы мәліметтер төмендегідей:

1930-1938 жылдар  толымсыз орта мектебі ретінде болды.

1939-40 жылдары №42 мектеп атанып, М.Турсунматов директор қызметін атқарған. 1941-42 жылдары Э.Исмаилов, 1942-43 жылдары С.Абдухаюмов, 1943-44 жылдары А. Вахидов, 1945-1946 жылдары М.Мансуров, 1947-1948 жылдары С.Хошимов, 1948-1953 жылдары И.Юнусов, 1953-1961 жылдары №388 мектеп атанып, С.Полатов, 1962-86 жылдары №388 Ә.Науаи атындағы мектепті  М.Абдураупов, 1986-1997 жылдары №1 Ә.Науаи атындағы мектепті Р.Мусин, 1998-2010 жылдары №13 Ә.Науаи атындағы мектепті С.Маматраимов, 2010-2022 жылдар Х.Ажиметов директор қызметін атқарған. Қазіргі таңда Диметов Хусен Тулегенович басқарып отыр.

Киелі шаңырақ өзі құрылған 95 жылда талайларды алақанға сап аялап, талайлардың шырқау биікте самғауына септігін тигізіп келеді. Осы жылдар ішінде мектеп абыройын көтерген шәкірттер, ғылым докторлары мен кандидат атанған шынайы білім иелері әрқашанда білім ордасының мақтанышы. Олар: техника ғылымдарының докторлары, профессор Хамракулов Исмаил Воситұлы, профессор Диметов Хаким Нишанбайұлы, медицина ғылымдарының докторлары Абдухаликов Олимжан Каримжанұлы, Даутов Таирхан Бекполатұлы, архитектура ғылымдарының докторы Салимов Орифжан Муслимұлы.

 

Қызметкерлер саны: 193