Мемлекеттік атаулы әлеуметтік көмек
Мемлекеттік атаулы әлеуметтік көмек – бұл жан басына шаққандағы орташа айлық табысы облыстарда, республикалық маңызы бар қалаларда, астанада белгіленген кедейлік шегінен төмен жеке тұлғаларға (отбасыларға) мемлекет ақшалай нысанда беретін төлем.
Жан басына шаққандағы орташа табысы кедейлік шегінен аспайтын Қазақстан Республикасы азаматтарының, қандастардың, босқындардың, шетелдіктердің және Қазақстан Республикасында тұрақты тұратын, азаматтығы жоқ адамдардың атаулы әлеуметтік көмек алуға құқығы бар.
Атаулы әлеуметтік көмек тағайындау үшін тұрғылықты жері бойынша мансап орталығына, ал ауылдық жерде – кент, ауыл, ауылдық округ әкіміне жүгіну қажет.
Атаулы әлеуметтік көмек тағайындау үшін келесі құжаттарды ұсыну қажет:
- өтініш;
- жеке басын куәландыратын құжат (Қазақстан Республикасы азаматының жеке куәлігі (паспорты), Қазақстан Республикасында тұрақты тұратын шетелдіктің тұруға ықтиярхаты, азаматтығы жоқ адамның куәлігі, босқынның куәлігі), қағаз жеткізгіштегі қандастар куәлігі не оның орнына электрондық құжат, цифрлық құжаттар сервисінде болған кезде – сәйкестендіру үшін.
Мансап орталығы өтінішті қабылдау кезінде өтініш беруші туралы мәліметтер алу үшін мемлекеттік органдар мен ұйымдардың тиісті ақпараттық жүйелеріне сұрау салулар қалыптастырады.
Ақпараттық жүйелерде мәліметтер болмаған жағдайда мансап орталығы тиісті мемлекеттік органға және (немесе) ұйымға жазбаша сұрау салуды ресімдейді не өтініш беруші құжаттарды қағаз түрінде ұсынады.
Жұмыспен қамтуға жәрдемдесудің белсенді шараларына тартылатын бірге тұратын еңбекке қабілетті отбасы мүшелерінің өтінішіне қосымша қоса беріледі:
- жұмыс іздеп жүрген адам ретінде тіркеуге өтініш;
- он алты жасқа толмаған тұлғаның ата-анасының немесе заңды өкілдерінің бірінің еңбек қызметін жүзеге асыруға келісімі туралы еркін нысандағы жазбаша өтініші.
Мемлекеттік атаулы әлеуметтік көмекті тағайындаудың барлық мәселелері бойынша Сіз тұрғылықты жеріңіздегі мансап орталығына жүгіне аласыз.
Мансап орталықтарының байланыс номерлерін осы жерден білуге болады.
ҚҰҚЫҚТЫҚ НЕГІЗ
- Казақстан Республикасының Әлеуметтік кодексі
- Мемлекеттік атаулы әлеуметтік көмекті тағайындау және төлеу қағидалары (Қазақстан Республикасы Премьер-Министрінің орынбасары - Еңбек және халықты әлеуметтік қорғау министрінің 2023 жылғы 21 маусымдағы № 227 бұйрығы)