«Электрондық еңбек биржасы» мемлекеттік ақпараттық порталын қолдану туралы Пайдаланушы келісімі

    1. ЖАЛПЫ ЕРЕЖЕЛЕР

    1.1. Осы «Электрондық еңбек биржасы» мемлекеттік ақпараттық порталын қолдану туралы Пайдаланушы келісімі (бұдан әрі – Келісім) жұмысқа орналасу және жұмыспен қамту саласындағы мемлекеттік қызметтер көрсетілетін порталын (enbek.kz), Enbek мобильді қосымшасын, онлайн режимде кәсіптік оқыту платформасын (skills.enbek.kz), кәсіпкерлік бастамалар порталын (business.enbek.kz) және еңбек ресурстары порталын (hr.enbek.kz) пайдалану бойынша жеке және (немесе) заңды тұлғалармен болатын қатынастарды реттейді.

    1.2. Осы Келісімде мынадай ұғымдар пайдаланылады:

    1) «Электрондық еңбек биржасы» enbek.kz мемлекеттік ақпараттық порталы (бұдан әрі – Портал) – бос орындар мен түйіндемелерді ақысыз негізде жариялау мүмкіндігін, орналастырылған ақпаратқа еркін қол жеткізуді қамтамасыз ететін жұмысқа орналастыру бойынша цифрлық алаң;

    2) Онлайн режимде кәсіптік оқыту платформасы (бұдан әрі – Skills.enbek.kz) – Порталдың ішкі жүйесі, skills.enbek.kz домендік атауда орналасқан, халықтың білім деңгейі мен кәсіби біліктілігін арттыруға арналған;

    3) Кәсіпкерлік бастамаларды қолдау платформасы (бұдан әрі – Business.enbek.kz) – Порталдың ішкі жүйесі, business.enbek.kz домендік атауда орналасқан, «Бастау Бизнес» жобасы бойынша кәсіпкерлік негіздеріне оқыту шарттары сәйкестігіне тексеруден өтуге және бизнес-идеяны іске асыру үшін мемлекеттік грант алуға өтініш беруге арналған; 

    4) Еңбек ресурстары платформасы (бұдан әрі – Hr.enbek.kz) – Порталдың ішкі жүйесі, hr.enbek.kz домендік атауда орналасқан, еңбек шарттарын есепке алуды, мемлекеттік органдардың, жұмыс берушілер мен қызметкерлердің өзара әрекетін автоматтандыруға арналған;

    5) Пайдаланушы – осы Келісімнің шарттарын қабылдаған жеке немесе заңды тұлға;

    6) Портал әкімшісі (бұдан әрі – Әкімші) – Порталға әдістемелік, техникалық сүйемелдеуді және жүйелік-техникалық қызмет көрсетуді жүзеге асыратын «Еңбек ресурстарын дамыту орталығы» акционерлік қоғамының қызметкерлері;

    7) Тіркеулік жазбасы (аккаунт) – бағдарламалық қамтамасыз етуде және (немесе) Портал жүйесінде сақталатын, оған қол жеткізуді қамтамасыз ету мақсатында Пайдаланушыны сәйкестендіру үшін қажетті ақпаратты қамтитын деректер жиынтығы;

    8) Портал иесі – Қазақстан Республикасы Еңбек және халықты әлеуметтік қорғау министрлігі;

    9) Порталда жұмыс істеу жөніндегі нұсқаулық – Порталда қандай да бір әрекеттерді орындау немесе жүзеге асыру тәртібі мен тәсілін белгілейтін қағидаларды, нұсқауларды немесе басшылықтарды қамтитын құжат.

    1.3. Осы Келісім Қазақстан Республикасы Азаматтық кодексінің 395-бабының 5-тармағына сәйкес жария шарт-оферта (ұсыныс) болып табылады және Порталды пайдалану кезінде туындайтын қатынастарды реттейді.

    1.4. Әкімші пайдаланушыға ескертусіз осы Келісімнің тармақтарын кез келген уақытта өзгерту, қосу немесе жою құқығын өзіне қалдырады.

Осы Келісімнің жаңа редакциясы Порталда жарияланған сәттен бастап күшіне енеді.

    2. КЕЛІСІМНІҢ МӘНІ

    2.1. Осы Келісімнің мәні Пайдаланушыға Порталда қамтылған ақпаратқа қол жеткізуді ұсыну және Порталдың және (немесе) мобильді қосымшаның мынадай қызметтері мен сервистерін көрсету жөніндегі өзара қатынастарды реттеу болып табылады:

    1) Enbek.kz:

  • кәсіпорынды қосу;
  • бос жұмыс орындарын орналастыру;
  • мемлекет субсидиялайтын жұмыс орындарын ұйымдастыру;
  • қызметкерлерді босату туралы мәліметтерді ұсыну;
  • кәсіпорын қызметін декларациялау;
  • түйіндемені орналастыру;
  • тұрақты жұмыс орындарына, сонымен қатар мемлекеттік қызметке жұмысқа орналастыру;
  • жұмыс іздеп жүрген адам ретінде тіркелу;
  • жұмыссыз ретінде тіркелу;
  • жұмысынан айырылған жағдайда әлеуметтік төлем;
  • мемлекет субсидиялайтын уақытша жұмыс орындарына жұмысқа орналастыру;
  • Еуразиялық экономикалық одаққа (Қазақстан, Армения, Беларусь, Қырғызстан және Ресей) мүше бес мемлекеттің интернет-порталдарының деректерін қамтитын «Шекарасыз жұмыс» бірыңғай іздеу жүйесінде жұмыс іздеу және персоналды іріктеу.

    2) Skills.enbek.kz:

  • онлайн курстарды Платформада орналастыру;
  • Платформада онлайн оқыту;
  • қорытынды тестілеуді тапсыру кезінде курстан өткені туралы сертификат алу, бұл ретте дұрыс жауаптардың шекті мәні 70%-дан төмен болмауы тиіс;
  • Kassa24.kz электрондық төлем жүйесі арқылы Платформада курсты таңдау кезінде белгіленген мөлшерде және тәртіпте онлайн оқыту құнын төлеу;
  • онлайн оқыту құнын қайтару Kassa24.kz электрондық төлемдер жүйесі арқылы платформада сатып алынған курс бойынша оқыту басталғанға дейін жүргізіледі.

    3) Business.enbek.kz:

  • «Бастау Бизнес» жобасы бойынша кәсіпкерлік негіздеріне оқыту шарттары сәйкестігіне тексеруден өту;
  • бизнес-идеяны іске асыру үшін мемлекеттік грант алуға өтініш беру;

    4) Hr.enbek.kz:

  • электрондық еңбек шартын жасасу;
  • еңбек шарттарын тіркеу;
  • еңбек кеңесшісі;
  • жеке істі қалыптастыру;
  • анықтамалық ақпарат.

    3. ПАЙДАЛАНУШЫНЫ ТІРКЕУ

    3.1. Пайдаланушылар үшін арнайы әзірленген кейбір қызметтерді пайдалану Порталда тіркелгеннен кейін ғана қолжетімді болады. Пайдаланушы Порталда тіркелу кезінде өзіне тиесілі электрондық пошта адресін (e-mail) немесе ұялы телефон нөмірін көрсетуге міндетті.

    3.2. Тіркеу кезінде Пайдаланушыға өзі көрсеткен логин (e-mail немесе ұялы телефон нөмірі) және құпия сөз беріледі, оны Пайдаланушы Порталмен жұмыс істеген кезде одан әрі пайдаланады.

Пайдаланушы тіркеу процедурасын тек бір рет өте алады. Тіркеу рәсімінсіз, «электрондық үкімет» порталының (egov.kz) аккаунты және әлеуметтік желілер арқылы кіруге болады.

    3.3. Порталда авторизациялау кезінде Пайдаланушыдан жеке басын растау үшін қосымша ақпарат сұратылуы мүмкін.

    3.4. Пайдаланушының құпия сөзін қалпына келтіру тіркеу кезінде көрсетілген e-mail немесе ұялы телефон нөмірінің көмегімен жүзеге асырылады.

    3.5. Тіркеу кезінде Пайдаланушы осы Келісімге келісімін білдіреді және Порталды пайдалану мен жұмыс істеуге байланысты онда көрсетілген келісім нысанына сәйкес құқықтар мен міндеттерді өзіне алады.

    3.6. Пайдаланушының профильдегі жеке ақпаратты өзгертуге қол жеткізуі Пайдаланушы тіркеу кезінде енгізген бірегей логин (электрондық пошта немесе ұялы телефон нөмірі) мен құпиясөз негізінде жүзеге асырылады.

    3.7. Порталда орналастырылған барлық ақпарат жұмыспен қамту орталықтарының жұмысқа орналастыруға және жұмысқа қабылдауға көмектесу мақсатында түсіндіру және одан әрі пайдалану үшін қолжетімді.

    3.8. Пайдаланушының жеке бөліміне кіру құпия сөзін және түйіндемедегі өтініш берушілердің жеке деректерін қоспағанда, Порталда жарияланған барлық деректер барлығына қолжетімді. Түйіндемедегі жұмыс іздеушілердің жеке деректері Порталда авторизацияланған жұмыс берушілер мен жеке жұмыспен қамту агенттіктеріне ғана қолжетімді.

    4. ТАРАПТАРДЫҢ ҚҰҚЫҚТАРЫ МЕН МІНДЕТТЕРІ

    4.1. Пайдаланушы құқылы:

    4.1.1. осы Келісімнің талаптары сақталған жағдайда Порталды пайдалануға қол жеткізу;

    4.1.2. осы Келісімнің 2-бөлімі 2.1-тармағында сипатталған қызметтерді алу үшін Порталды пайдалану;

    4.1.3. Тіркеулік жазбасына кіру үшін логинді және (немесе) құпиясөзді өзгерту;

    4.1.4. Қазақстан Республикасының заңнамасында тыйым салынбаған өзге де құқықтарды жүзеге асыру;

    4.1.5. Порталды пайдалану бойынша Әкімшіден кеңес сұрау және тәжірибелік көмек алу.

    4.2. Пайдаланушы міндеттенеді:

    4.2.1. Әкімшіге Порталдағы тіркеу нысанында ұсынылған тармақтар бойынша сенімді, нақты және толық ақпаратты ұсыну. Әкімшінің Пайдаланушы ұсынған ақпараттың дұрыс еместігіне қатысты кез келген күмәні тіркеуден бас тартуға, Пайдаланушының Тіркеулік жазбасын уақытша бұғаттауға және (немесе) жоюға әкеп соғады;

    4.2.2. өзін басқа жеке немесе заңды тұлға ретінде көрсетпеу;

    4.2.3. Тіркеулік жазбаға кіру үшін пайдаланылатын бірегей логин мен құпия сөзді құпия сақтау. Тіркеулік жазбаның логині мен құпия сөзі құпия ақпарат болып табылады және Қазақстан Республикасының қолданыстағы заңнамасында көзделген жағдайларды қоспағанда, жария етуге жатпайды. Пайдаланушының өз Тіркеулік жазбасының құпия сөзі мен логинін жоғалтуына байланысты кез келген қауіптерді Пайдаланушы өз бетінше көтереді;

    4.2.4. осы Келісімнің 1-бөлімінің 1.4-тармағына сәйкес енгізілген өзгерістермен танысу мақсатында Порталда осы Келісімнің мазмұнымен мерзімді түрде танысып тұру.

    4.2.5. Порталда орналастыруға болмайды:

    1) Пайдаланушының заң бойынша немесе қандай да бір шарттық қатынастарға сәйкес жария етуге құқығы жоқ ақпаратты;

    2) қолданыстағы заңнаманы, ар-намыс пен қадір-қасиетті, үшінші тұлғалардың құқықтары мен заңмен қорғалатын мүдделерін бұзатын ақпаратты;

    3) авторлық және (немесе) сабақтас меншік құқығын бұзатын ақпаратты;

    4) қорлайтын мазмұндағы ақпаратты, сондай-ақ адамдарды қандай да бір белгі бойынша кемсітуді, зорлық-зомбылықты, жеккөрушілікті насихаттайтын ақпаратты;

    5) құрамында вирустар немесе басқа да зиянды бағдарламалық қамтамасыз ету бар ақпараттар және (немесе) материалдарға сілтемелер.

    4.2.6. осы Келісімде және Қазақстан Республикасының мынадай нормативтік құқықтық актілерінде бекітілген өзге де талаптарды сақтауға және өзге де міндеттемелерді орындауға:

    1) «Халықты жұмыспен қамту туралы» Қазақстан Республикасының Заңы;

    2) Қазақстан Республикасы Еңбек және халықты әлеуметтік қорғау министрінің 2018 жылғы 19 маусымдағы №259 бұйрығымен бекітілген жұмыс іздеп жүрген адамдарды, жұмыссыздарды тіркеу және халықты жұмыспен қамту орталықтары көрсететін еңбек делдалдығын жүзеге асыру қағидалары;

    3) Қазақстан Республикасы Еңбек және халықты әлеуметтік қорғау министрінің 2020 жылғы 3 қыркүйектегі №353 бұйрығымен бекітілген еңбек шарттарын есепке алудың бірыңғай жүйесінде еңбек шарты туралы мәліметтерді беру және алу қағидалары;

    4) Қазақстан Республикасы Денсаулық сақтау және әлеуметтік даму министрінің 2016 жылғы 14 маусымдағы №516 бұйрығымен бекітілген мемлекет субсидиялайтын уақытша жұмыс орындарын ұйымдастыру және қаржыландыру қағидалары;

    5) Қазақстан Республикасы Еңбек және халықты әлеуметтік қорғау министрінің 2022 жылғы 14 шілдедегі №263 бұйрығымен бекітілген кәсіпкерлік бастамашылыққа жәрдемдесу жөніндегі шараларды ұйымдастыру және қаржыландыру қағидалары.

    4.2.7. Портал қызметтерін келесі мақсаттарда пайдаланбау:

    4.2.7.1. заңсыз болып табылатын үшінші тұлғалардың кез келген құқықтарын бұзатын, нәсілдік, ұлттық, жыныстық, діни, әлеуметтік белгілері бойынша зорлық-зомбылықты, қатыгездікті, жеккөрушілікті және (немесе) кемсітушілікті насихаттайтын және нақты тұлғаларға, ұйымдарға, билік органдарына қатысты дұрыс емес мәліметтерді және (немесе) қорлауды қамтитын контеттерді жүктеп салу;

    4.2.7.2. Қазақстан Республикасының аумағында қолданылатын шектеулер мен тыйымдарды бұзуға бағытталған адамдарға жәрдемдесу, сондай-ақ құқыққа қарсы іс-әрекеттер жасауға ынталандыру;

    4.2.7.3. кәмелетке толмаған адамдардың құқықтарын бұзу және (немесе) оларға кез келген нысанда зиян келтіру;

    4.2.7.4. өзіне жеткілікті құқықтарсыз, оның ішінде Портал қызметкерлері үшін басқа адам немесе ұйымның және (немесе) қоғамдастықтың өкілі атынан өзін ұсыну;

    4.2.7.5. Порталда орналастырылған ақпарат пен деректерге қатысты саналы түрде жаңылыстыру.

    4.3. Пайдаланушыға тыйым салынады:

    4.3.1. Портал мазмұнына қол жеткізу, сатып алу, көшіру немесе қадағалау үшін кез келген құрылғыларды, бағдарламаларды, процедураларды, алгоритмдер мен әдістерді, автоматты құрылғыларды немесе баламалы қол процестерін пайдалану;

    4.3.2. Порталдың дұрыс жұмыс істеуін бұзу;

    4.3.3. осы Порталдың сервистері арнайы ұсынбаған ақпаратты, құжаттарды немесе материалдарды кез келген құралдармен алу немесе алуға әрекет жасау үшін Порталдың навигациялық құрылымын кез келген тәсілмен елемей өту;

    4.3.4. Портал функцияларына, Порталға жататын кез келген басқа жүйелерге немесе желілерге, сондай-ақ Порталда ұсынылатын кез келген қызметтерге рұқсатсыз қол жеткізу;

    4.3.5. Порталда немесе Порталға жататын кез келген желіде қауіпсіздік немесе аутентификация жүйесін бұзу;

    4.3.6. Порталдың кез келген басқа Пайдаланушысы туралы кез келген ақпаратты іздеуді, бақылауды жүзеге асыру;

    4.3.7. Порталды және оның мазмұнын Қазақстан Республикасының заңнамасында тыйым салынған кез келген мақсаттарда пайдалануға, сондай-ақ Портал иесінің немесе басқа да адамдардың құқықтарын бұзатын кез келген заңсыз қызметке немесе басқа қызметке итермелеуге;

    4.3.8. Инвестициялық пирамидалар мен схемаларға, матрицалық бағдарламаларға, жылдам байытудың басқа да ұқсас схемаларына немесе желілік маркетинг бағдарламаларына, өз мазмұны бойынша бөтеннің мүлкін ұрлауға немесе алдау немесе теріс пайдалану жолымен бөтеннің мүлкін иеленуге бағытталған өзге де бағдарламаларға қатысу туралы ақпаратты орналастыру.

    4.4. Әкімші құқылы:

    4.4.1. Пайдаланушы осы Келісімнің шарттарын бұзған жағдайда Пайдаланушыға тіркеуден бас тартуға, Пайдаланушының есептік жазбасын жоюға немесе бұғаттауға;

    4.4.2. Қазақстан Республикасының заңнамасында айқындалған тәртіппен Пайдаланушыдан қажетті ақпаратты сұрату және алу;

    4.4.3. Порталда Пайдаланушы ұсынған ақпараттың дұрыстығын тексеру;

    4.4.4. кез келген уақытта Порталдың рәсімделуін және Пайдаланушы интерфейсін, оның мазмұнын, ұсынылатын функциялардың мазмұнын өзгерту, Пайдаланушының ескертуінсіз пайдаланылатын сценарийлерді, бағдарламалық қамтамасыз етуді, контентті және Порталда пайдаланылатын немесе сақталатын басқа да объектілерді және кез келген қосымшаларды өзгерту немесе толықтыру;

    5. КЕЛІСІМНІҢ КҮШІНЕ ЕНУІ

    5.1. Осы Келісім Пайдаланушы Порталда тіркеу рәсімінен өту арқылы оның шарттарын (акцептін) қабылдаған сәттен бастап күшіне енеді, бұл Қазақстан Республикасы Азаматтық кодексінің 396-бабы 3-тармағының мәні бойынша әкімшінің офертасын қабылдау (акцепт) болып табылады.

Осы Келісім белгісіз мерзімге қолданылады.

    5.2. Тіркеу Пайдаланушыны тіркеу нысанын толтыру, Пайдаланушының осы Келісімнің барлық шарттарымен келісімін білдіру және тіркеу нысанының деректерін Порталдағы жұмыс жөніндегі нұсқаулыққа сәйкес Порталға жіберу жолымен орындалады.

    6. ЖАУАПКЕРШІЛІК

    6.1. Порталда кез келген ақпаратты, мәліметтер мен материалдарды енгізген кезде Пайдаланушы өзі орналастыратын материалдардың, мәліметтер мен деректердің мазмұнына, оларды орналастырудың және пайдаланудың заңдылығына Қазақстан Республикасының заңнамасына сәйкес дербес жауапты болады.

    6.2. Пайдаланушы өзінің құпия сөзін қауіпсіз сақтау үшін, сондай-ақ ол бұзылған кезде болуы мүмкін салдарлар үшін жеке жауап береді.

    6.3. Пайдаланушы Порталда міндетті түрде орналастыруға жататын материалдарды, ақпаратты және мәліметтерді Порталда уақытылы орналастыру бойнша дербес жауапты болады.

    6.4. Әкімші Пайдаланушының Порталда орналастыратын ақпараттың, мәліметтердің, материалдардың мазмұны, олардың Қазақстан Республикасы заңнамасының талаптарына сәйкестігі, Пайдаланушының Порталда орналастырылған ақпаратты, мәліметтер мен материалдарды пайдалану жөніндегі заңсыз әрекеттері, Пайдаланушының үшінші тұлғалардың кез келген басқа құқықтарын бұзғаны үшін жауапты болмайды.

    6.5. Әкімші әкімшіге тәуелсіз себептер бойынша немесе Порталға қызмет көрсету бойынша жоспарлы немесе жоспардан тыс іс-шаралар жүргізілген жағдайда туындаған Портал жұмысындағы техникалық уақытша іркілістер мен үзілістер үшін жауапты болмайды.

    6.6. Әкімші уақытша іркілістер мен ескерілмейтін күш мән-жайлары, оның ішінде электр желілерінің, Интернет желісінің жұмысындағы іркілістер және Әкімшіден тәуелсіз туындаған және осы Келісімнің талаптарын орындауға кедергі келтіретін басқа да мән-жайлар үшін жауапты болмайды.

    6.7. Әкімші басқа Пайдаланушылардың және (немесе) Порталдың кез келген басқа қатысушыларының әрекеттері үшін Пайдаланушы алдында жауап бермейді.

    6.8. Әкімші пайдаланудан келтірілген залалға, деректердің жоғалуын немесе басқа да материалдық емес шығындарға, беделге нұқсан келтіруге және одан туындайтын өзге де залалды қоса алғанда, кез келген тікелей, жанама залал үшін жауапты болмайды:

    1) Порталды пайдалану немесе пайдалана алмауға;

    2) осы Келісімнің талаптарын өзгертуге;

    3) Пайдаланушының деректеріне немесе Пайдаланушы жіберген немесе сервер деректерінде сақталған өзгерістерге рұқсатсыз қол жеткізуге;

    4) Порталда көрсетілетін қызметтерге қатысты кез келген басқа жағдайға.

    7. БАСҚА ШАРТТАР

    7.1. Пайдаланушы Әкімшінің өзі туралы мемлекеттік және (немесе) мемлекеттік емес ақпараттық жүйелерде (дерекқорларда) қамтылған қосымша мәліметтерді алуына және жариялауына қарсы болмайды.

    7.2. Порталдың және (немесе) оның ішкі жүйелерінің техникалық жұмысына қатысты барлық шағымдар, сұраулар, сұрақтар, кез келген өзге де хат-хабарлар Порталдың және (немесе) оның ішкі жүйелерінің басты бетінде көрсетілген кері байланыс нысаны арқылы жіберілуге тиіс.

    7.3. Пайдаланушы материалдарды, ақпаратты және мәліметтерді орналастыруға және (немесе) пайдалануға байланысты үшінші тұлғалардан шағымдар түскен жағдайда, Пайдаланушы дербес және өз есебінен аталған шағымдарды реттейді.

    8. ДАУЛАРДЫ ШЕШУ

    8.1. Осы Келісімнің Тараптары арасында кез келген келіспеушіліктер немесе даулар туындаған жағдайда, сотқа жүгінгенге дейін талап қоюдың (дауды ерікті түрде реттеу туралы жазбаша ұсыныстың) алдын ала ұсынылуы міндетті шарт болып табылады.

    8.2. Шағымды алушы оны алған күннен бастап күнтізбелік 15 күн ішінде шағым берушіні шағымды қарау нәтижелері туралы жазбаша хабардар етеді.

    8.3. Дауды ерікті тәртіппен шешу мүмкін болмаған кезде Тараптардың кез келгені Қазақстан Республикасының қолданыстағы заңнамасымен берілген өз құқықтарын қорғау үшін сотқа жүгінуге құқылы.

    8.4. Порталды пайдалану шарттарына қатысты кез келген талап Қазақстан Республикасы Азаматтық кодексінің нормаларына сәйкес қойылуы тиіс.

    9. ҚОСЫМША ШАРТТАР

    9.1. Әкімші осы Келісімнің өзгеруіне қатысты Пайдаланушыдан қарсы ұсыныстарды қабылдамайды.

    9.2. Порталда орналастырылған Пайдаланушының пікірлері құпия ақпарат болып табылмайды және оны Әкімші шектеусіз пайдалана алады.

    9.3. Порталда деректерді қазақ немесе орыс тілдерінде жариялауға болады. Ақпарат қазақ немесе орыс тілдерінің нормаларына сәйкес болуы керек, яғни оларда орфографиялық, пунктуациялық және стилистикалық қателер болмауы керек.

2022 жылдың 30 қарашасында өзгертілді

Қиындықтар туындады ма?

Бізге техникалық қолдау қызметіне хабарласыңыз, сондықтан біз сіздің мәселеңізді шеше аламыз.